Komisioni Qendror i Zgjedhjeve (KQZ) ka bërë të ditur se në Qendrën e Numërimit dhe Rezultateve (QNR) po vazhdon procesi i rinumërimit të fletëvotimeve, sipas listës së vendvotimeve për të cilat KQZ ka marrë vendim.

Sipas njoftimit të KQZ-së, nga fillimi i këtij procesi, të martën më 13 janar 2026 në ora 18:00, e deri të mërkurën më 14 janar 2026 në ora 16:00, janë rinumëruar gjithsej 64 nga 914 vendvotime. Këto vendvotime u përkasin komunave të ndryshme, përfshirë: Deçan (5), Gjakovë (15), Gllogoc (6), Gjilan (13) dhe Dragash (25).

KQZ ka njoftuar se rezultatet e rinumërimit do të publikohen në platformën zyrtare për rezultate zgjedhore, në adresën https://resultsparliamentary2025.kqz-ks.org/ në seksionin QNR > Rinumërim, menjëherë pas përfundimit të numërimit për secilin vendvotim.

Sipas vendimit të KQZ-së, në 10 komuna do të rinumërohen 100 për qind e vendvotimeve, konkretisht në: Dragash, Kaçanik, Leposaviq, Prizren, Skënderaj, Shtime, Ferizaj, Vushtrri, Mamushë dhe Ranillug. Ndërkaq, në 28 komuna të tjera do të rinumërohen nga 10 për qind e vendvotimeve, përfshirë Deçanin, Gjakovën, Gllogocin, Gjilanin, Prishtinën, Pejën, Podujevën, Mitrovicën e Jugut dhe atë të Veriut, si dhe komuna të tjera.

Vendimi për rinumërimin e një numri kaq të madh të vendvotimeve është marrë pas dyshimeve për mospërputhje të votave ndërmjet kandidatëve për deputetë të subjekteve të ndryshme politike. Sipas KQZ-së, vendvotimet që do t’i nënshtrohen rinumërimit përbëjnë rreth 36 për qind të totalit në nivel vendi.